احببت طليقي

نعرفكم براسي سميتي يسرى 25 عام زويينة و طويلة ههه كنشرلكم فراسي عينيا مايلين لزروقيه غير مايلين ماشي زرقين هه شعري زعر و رطب و طويل ولاكن كندير زيف على برا طاي ديالي زوينة بشهادة الناس ههه المهم انا مطلقة هادي 3 سنين والداي ماتو ملي كانت عندي 10 سنين عندي خويا واحد راه فالخاريج مكيجيش بزاف ولاكن ديما كنهضرو رباتني غير جداتي لي حتا هي توفات مور ما طلقت بعام ملي توفات بقيت بوحدي عاودت دار دجدة لي كانت كتبتها بسميتي وريديتها فنة ساكنة فيها حاليا خداما مهندسة فواحد الشركة حياتي مستقلة معنديش اصدقاء بزاف يالاه جوج صفاء و الياس خدامين معاياا ضريفيين و كنحمااق عليهم و غدا عندي اجتماع مهم مع الزبناء الجداد و المدير مكلفني انا كرئيسة المشروع يالاه تصبحو على خير خاصني نفيق بكري ولا غيتقلق .
في الصبااح : أنا : اويليي على فضيحة الساعة 10 وانا باقا ناعسة وتي تكعدي منهنا وييلي هاد النهار يجريو عليا و الاجتماع يكون سالا نااري مي كفااارت عليا . نوضت كنعتر فرجليا لبست سروالي و قميجة و كوستيم حوايج العمل و مشيت كنطير حمد الله وصلت . إلياس : افيين كنتي ايسرى المدير عايهبل حشمتيه مع الزبناء . صفاء: سكت متزيدش تخلع فيها مكتشوفهاش كي صفرة الفطور ويمكن مفطراتش مهم تي سيري عندو بعدا راه فالمكتب ديالو ااه ومتنسايش قراي سورة الناس عادا دخلي ههه . أنا : بعدو بعدو مني اش غيوقع كااع
2 دخليت لبيرو دالمدير وانا الخلعة شادني من كوارعي أنا: موسيو برادة نقد ندخل؟ المدير معصب : كطلبي الادن باش دخلي و ماطلبيهش باش تعطلي ؟؟ أنا : والله اموسيو مادرتها بلعاني و .. قاطعني : صاف صااف باركا عليا اجي تكلسي نفهمك اش داز عليك فالاجتماع أنا : واخا موسيو هي الولا المدير : مهم مشروعك عجب بزاف لزبناء و قررو باش ينفدوه على أراضهم و نتي فالاجتماع جاي غادا تشرحيه ليهم بالتفاصيل وسيري تعطلي تاني غير متحلميش تحطي رجليك هنا أنا : لا اسيدي كوون هااني نشاءالله نحمر ليك الوجه صافي لممحتاجنيش نمشي نكمل خدمتي اموسيو المدير : صافي غير سيري وسيفطيلي وراق المشروع القديم مع الكاتبة أنا :واخا سيدي .. مع رااسي ااوف فلت هااد المراا .سااارة اجي دي الوراق لمدير ( سارة الكاتبة ) انسة يسرى متصوريش هادوك الزبناء لي جاو شحال بووكووسين وييلي و مول الارض كييييحمق أنا : سكتي سكتي هااكي دي الوراق ونتي لي ضربك ضربك على الرجاال سارة : ااه ماشي بحالك مقابلة غير الوراق حتا تشيبي معقدة أنا : وتيي سييري قبل ماندير فيك شرع يديا كنكولك فوتيني عليييك .سارة : هاهي غادة. أنا : (مع راسي) رااسي غيطرطق محتااجه شي قهوة. صفااء : طلبتي غير المجود هاكي شدي أنا : طيرتيها مني خلعة اصحبتي اري فيها سكر ؟؟ صفاء : وقوولي غي شكرا ونتي كي الهييشة. فيها غحنجري أنا : هيهيهيي ششكراا احببتي لهلا يخطيك عليا وخلاص .على خااطرك دابا صفاء : اجي شنو قالك الشاارف ياكما دابز معاك أنا : يا ختي غي سكتي ولاكن عارفني كنرطب الحدييد ههه صفاء : أياه منخفش عليك حقاا الشركاء الجدااد ناري كولهم صغار وبوكوضين اما مول الارض سخفت فاش شتو تقولي غي تركي
أنا : اوف حتا نتيي مقلت حتا سكت ديك الثرثارة دسارة اجي بعدا منين هوما وفين كاينا هاد الارض لي غيتنفد فوقها المشروع صفاء: اختي منعرف راكي عارفا انا مشغولة غي بمشروع المول كاع مدخلت سولي سارة أنا :مهم مايهمش سيري كملي خدمتك و خليني نخدم نتلقاو مع 12 باش نتغداو .و صلت 12 و تغدينا كي العادة ودابا كنوجد راسي الاجتماع الجاوج خصني نركز و ندبر شي طريقة لي نشرح بيها باش يفهمو ،مشاريعي شوية معقدين.وصل الوقت و وصلو الزبناء دخلو الشركاء دالزبون الجديد لقاعه الاجتماعات بقا غي مول الارض مع المدير مهم ندخل نتعرف عليه بعدا و نعتادر على الصباح أنا : موسيو نقد ندخل المدير: انسة يسرى دخلي تقضلي نقدملك رضا البناني الزبون الجديد ديالنا. تخلعت انا تزعزعععت بقييت جاامدة فبلاصتي بمجرد سمعت سمية فاش دار عندي زدت كملت و هو كدالك بقا مصدوم الحاجة الوحيدة ليقال هي رضا : اش كديري نتي هنا المدير : سي البناني كنقدم ليك المهندسة المكلفة بالمشروع ديالكم يسرى مستور ولكن بانليا بحالا كتعرفو بعضيتكم ، كلسي ا آنسة بعدا مالك جامدة فبلاصتك. أنا كلست و كانشوف فيه نضرات كلها حقد وهو كدالك كيبادلني نفس النضرات مخلطين مع الصدمة أنا : مرحبا بموسيو رضا المدير : شرحولي هاد الموقف واش كتعرفو بعضياتكم سي رضا قول شي حاجا .. يسرى .. أنا : ( كنشوف فرضا) لا اموسيو برادة مكنعرفوش اصلا راك عارفني عمري ندخل الخصوصيات مع الخدمة و سي رضا هنا كزبون و انا كمهندسة و متسالوني غير نقوم بالواجب ديالي على اكمل وجه و زايدون حنا مزال مكنعرفوش بعضيتنا مزيان ولا لا اموسيو رضا . رضا : اه انسة يسرى عندها الحق كون هاني اسي برادة حنا هنا على قبل الخدمة المدير : صاف انا مكيهمنيش لي كيهمني هو ميكونوش مشاكل فعلاقتنا العملية معا سيادتكم و تعجبكم الخدمة


رجعت المكتب ديالي و كنهدر مع راسي كي شي حمقة انا : ااااوف لاش دخل لحياتي مرا اخرى ااوف(واقله خربقتكوم الراجل لي لقيت فالمكتب هو طليق ديالي راجلي القديم دوزنا 3 شهور دزواج و متفهمناش واخا ختارينا بعضيتنا و عجبني و عجبتو لاكن علاقتنا ما فاتتش الاعجاب يعني مطورتش للحب صراحة مكانش بيناتنا تفاهم كبير كل واحد فين جارها و كان ضد اني نخدم و لاكن دابا استقليت بقراراتي وليت انا المسؤولة على راسي ميتحكم فيا حد نهار تفارقنا كان نهار لي قررت نخدم و هو رفض و تخاصمنا و اااخر هدرة قالها ليا هي ( راه مزال مكنعرفوش بعضياتنا مزيان ) بقات فقلبي كجمرة ولاكن ملي رديتهالو قبيلة فالمكتب خفاف تقلها شوية عليا مهم انا ماهمنيش باغا غي خدمتي ما بغا لا حب لا زواج لا والو ) اوف لاش دخلتي لحياتي و ديك الارض زعما كان قالي فعيد ميلادي غيوجدلي فيها مفاجأة ودابا بغا يبني فوقها دار العجزة العجب. الياس: يسرى !شفتك كتهدري بوحدك ودمك هايج ياك لاباس يكما ماتفقتوش مع الزبنااء .. أنا : ااه يا اليااس كوون كانت هاكاك. إلياس : اوا بلا الغاز ايسرى هضري. أنا : عرفتي شكون اهوا الزبون الجديد ؟ إلياس : لا شكون .أنا : رضا راجلي القديم إلياس : اشنو ؟ شنوو كاتقولي واش بصاح لا ميمكنش. أنا : اه الياس هو بلحمه و عضمه هااد النهار بااين من صباحو اوف غنحماق اش هاد الزهر عندي( غلبوني الدموع )إلياس : ااوه يسرى متبكيش صاف موقع والو ياك نتوما تفارقتو حبيا اوا مسحي دموعك و اعتابريه زبون بحال كاع الزبائن لي فاتو حتا تكمل الخدمة وكلا فطريقو صاااف مسحي دموعك مكتجيش معاك البكية أنا : لاش انا معندي زهر علاش حتا قلت صاف حياتي تقادات و غنبدا من جديد و دخل لحياتي عاوتاني إلياس : وا خلااص ايسرى حتا نتي ديري راسك مكتعرفيهش و تعاملي معاه عادي و مغيكون غي لخير ياك ماقلك والو هو ؟؟ أنا : لا حتا هو تجاهلني كيف تجاهلتو إلياس : اواا صاافي هانتي كملو هاكا وصافي يالاه مسحي دموعك راها صفاء جايا وغاتشد فيك . صفاء : وناااااري على حبيبتي و شكوون بكاالي لقطييييييوطة دياالي شكوووون. إلياس : هانتي شنو قتليك هههه. أنا : كاضحكو عليا دابا ياك هدي هي الصحبة بعدو مني
صفاء : وتوما قلولي اش واقع الياس مال يسرى كتبكي إلياس : خليها هي تقولك حسن انا فالمكتب ديالي غنكمل شي خدمة رها قربت 6 مهم فاش تسالو الهضرة تلقاوني فالكافي كي لعادة أنا : لا ا إلياس انا مغنجيش كنقول غي فوقاش نمشي بحالي. إلياس : ولاا ايسرى راكي عارفا الكلسة مكتكملش بلا بيك و زايدون مكملناش الهضرة. صفاء : صااف ا إلياس كون هاني دابا نجيبها إلياس : واخا يالاه حتا نتشاوفو صفاء : هاكي كلينكس هودليك الريسي هههه اوا اصحبتي عاودلي اش وقعلك راني عارفا مكتبيني دموعك حتا كتوصل بيك العضم أنا : مكدبتييش اختي واااصلا بيا للعضم عرفتي الزبون الجديد مول الارض ! صفاء : اه دااك البووكووس مالو ؟ أنا : اودي منين جاتو هاداك لي كتقولي عليه البكوس راه هو راجلي القديم ررضاا صفاء : ااااشنوووو ؟؟؟ أنا: غي بشوية شوهتينا تسمعك سارة تلسقناا شوفي راه هاد الهضرة تبقى بيني و بينك و بين الياس غي نتوما لي عارفين وااايااك تخرح ماعدنا مانديرو بالمشاكيل .صفاء : لاكوني هانيا اصبحتي ناااري صدمتيني و ياك رضا تاجر فطوموبيلات اش دخلو لاعمال الخيرية : أنا : اختي والله وعلم والله مابقيت فاهما والو فالاجتماع دكرو الارض لي ف إفران كان معاودلي عليها مي عمري شفتها . مهم انا ميهمنيش هادشي، خدمتي غانديرها عايني نمشي نغسل وجهي و نمشيو لعند الياس راه خرج فحالو .صفاء: اجي بعدا واش شفتي ديك الفنييينون ديك المستثمر لي من برا ؟؟ أنا : شكون فيهم واش داك السمر ؟، صفاء: مسمرش بزاف دندااني وصاف راه كان معاكم فالاجتماع شتي يا ختي على شخصية عندو غي الوقفة ديالو باراكا ههه أنا : ههه اه عرفتو باينا فيه متقف واعي حيت كان كيدهر فالقاعة بحال شي مفكر كبيير اوا الله يحجبو لواليديه . صفاء: واه ولاكن انا راكي عارفني مكنفلت حتا حاجا شفتي فاش كنتو خارجين كان كيشوف غي لجيهتك راه باينا فيه تعجب بيك المسخوطا هعه حيت ديك الشووفاات .. أنا قاطعتها : اااشمن شوفاات بدييتي تاااني زيدي كودامي الولد كيتسنا و تجبديلي حس شي حد مرا خرا انا لي غنحيدلك الشووف ااه قاالك الشوفاات يشوف ولا يكلس صفااء : اه اه ياختي مالك دابا شعلتي صاف مقولت والو زيدي الولد كيتسنااا ونتي لبديتي مكتقضايش أنا : اوا هاكاك وزيدون لعجبك خوديه نتي هانتي الاله سميتو سي ناصر وساكن غير هنا اوالديه برا هه نزيدك شي حاجه مهم تمشاي ونهدرو. صفاء : بلعي معاك الباب راه غي حنا لي بقينا يالاه اجي شفتك عارفا كولشي باش عرفيتها ؟؟؟ يييسرى عععنداااك الطموبيل فااش ساهيا نتي مالك أنا : اااوف على خلعها ماشفتهاش اش كنتي تقولي ؟؟ صفاء : وردي بالك قتليك باش عرفتي على سي ناصر هادشي كامل . أنا : اوا من الاجتماع و صاف ... فين كالس هاد بنادم ؟؟ ااه راه يالاه .صفاء : زيدي


صفاء: راك هنا أجن
إلياس: لا لهيه ههه
صفاء: هاهاها ضحكتيني وما حامض شنو طلبتي
إلياس: كلسي كلسي ويكون خير ونتي ضاربها غي على كرشك ( دار عند يسرى لقاها ساهيا ) يسرى هيهو يسرى مالك شفتك ساهية
يسرى: اه نعام شنو قلتي
صفاء: اواعدي على صاحبتي وسي السيد طيرلها الفريخ
يسرى : صفااء
صفاء: هاني ساكتة
إلياس : يسرى شنو قررتي ؟
يسرى : ااه أ إلياس اش عندي نقرر . فكرت فهضرتك ولقيت عندك الحق
إلياس : احسن مادرتي .. ياك هي غي شهور وغاتسالي الخدمة وغايسلي كولشي و كلا فطريقو .. مهم ماتخسريش خدمتك .
صفاء: اه ايسرى إلياس عندو الحق وخا اول مرة كنتفق انا وياه .. ماتنسايش مور هاد الخدمة كتسناك ترقيه
يسرى : اه اصفاء مهم نساو علينا اصلا شكون اهوا ليغنضيع عليه خدمتي وحياتي الجديدة انا غنعيش حياتي كيف ما قبل مايستهلش نهضرو عليه
صفاء: هاكاك اصحبتي ودابا عجبت... ييي شفوو هاداك ماشي لي كان معاكم فالاجتماع ايسرى ؟،
يسرى : اه سي ناصر نارى شفتو بحالا جاي لجيهتنا هادا
ناصر : السلام وعليكم شنو مغتعرضيش عليا نكلس معاكم اشركتي الجديدة ( كيشوف فيسرى )
يسرى توترات : ااه اه كلس مرحبا نعرفك هادا صديقي الياس مكلف بأعمال اراضي الجالية و صافاء مك.. قاطعتها
صفاء مادة يدها : انا صافاء مهندسة مشرفين بيك
ناصر : متشرف بيكم ادن مادمتم معا يسرى غتكونو بنفس الدكاء تبارك الله يسرى ماخلتلنا منقولو زيادة على الجمال كاين الدكاء وروح الاقناع ( كيشوف فبها بنظرات الاعجاب )
الياس نضرات مخلطه مع الغضب و الابتسامة المصطنعه : اه يسرى تبارك الله لادارت شي حاجا فعقلها توصل ليها
صفاء ( كتراقب نضراتو فيسرى و كتراقب نضرات يسرى لي كلها لا مبلاة لناصر فقط ساهية ) : اوا اسي ناصر ونتا اشمن دور كلفوك بيه فهاك الخدمة
ناصر ( كيشوف فيسرى) مكلف ب لي تقالت على يسرى خفافت عليا
الياس تنحنح بغضب .. يسرى بقات غي كدور فعينيها بحالا باغا تهرب منداك الموقف. اما صفاء بحالا فهمات الموقف وبدات تبتسم ليسرى وتقوليها بعينها بلي راه معجب بيك لاكن تفكرات الياس لي كيبغي يسرى وهي تشوف لعندو بداو يتبادلو النضرات بحالا تيقوليها تصرفي ولا غنقتلو ..
قاطع ديك الصمت ديالهم الكارسون :
اش غتشربو
إلياس : انا مابغي والو شوف البنات( وناض مشا )
يسرى : الياس اجي فين ماشي ( ماجوبهاش )
صفاء : انا غانشوف مالوو ( مشات موراه ) اليااس عااين
يسرى : جيبلي واحد كافي نواغ
ناصر : حتا انا بحالها ( ناصر مهودش عينيه عليها وهي ماجيبا لدنيا خبار )
واش شفتي دوك النظرات لي كان كيشوف الياس فصفاء ؟
يسرى : لا اشمن نظارات ؟؟
ناصر : ( ضحك واحد الضحكة ) ااه ايسرى انا بحال هاد الحوايج مكيخفاوش عليا
يسرى : اشمن حوليج اسي ناصر
ناصر : الاعجاب ا انسة للاعجاااب
يسرى : شنو ؟؟ مفهمتش اشمن اعجاب كدوي عليه شنو زعما الياس معجب بيا لاا متقولهاش
ناصر : هههه لا ولاكن قربتي الياس معجب بصفاء وفاش كلست معاكم وشافها هضرت معايا بديك الطريقه غار وهو ينوض وياك شفتي تبعاتو متوترة
يسرى : ( حاطة يدها على فمها وكدور راسها وهي كتسترجع اللحضة فاش ناض وكيفاش توترت صفاء. و فسرتها على اساس بيناتهوم علاقه و مخبينها ) ااه عندك الحق اوا شووف انا زعما متيخبيو عليا والو ناااري كيفاش ملاحضتش ههه وااو لقيييت فاش نشد
ناصر : ههههه دابا ا انسة يسرى اه بعدا سميتك زوينة
يسرى : شكرا سي ناصر
ناصر : حيدي الرسميات عفاك زيدي عرفيني براسك
نرجعو ل الياس و صفاء
صفاء : الياااس ححبس عاين مالك
الياس : خارج من الكافي بزربة : بعدي مني اصفاء
صفاء ( شداتو ) عاين مالك اووف شحفتيني
الياس : الى نتي شحفتي انا راه كنت باقيلي شوية وندير جريمة
صفاء : ناري يا الياس والله حتا نسيت راسي حتا انا . وابسيف اصاحبي واش نتا عمرك بينتي ليها شي حاجه وباغيها تحس بيك نتا لي كتعاني ف صمت راك عارفها زوينا وحتا واحد مغيفلتها الى مطلقتيش راسك
الياس ( كيهضر وفعينيه نظارات اليأس ) : اختي راك شفتي فاش بغيت نصارحها معرفت منين خرجلنا ديك راجلها القديم وتاني قررت نصارحها فالكافي و هانتي كتشوفي وكنت موجد ليها رساله يجيبهالها الكرسون كنعبر ليها على حبي باش تفهم
صفاء : رسااله ؟؟ !!
الياس : اه رساله .. رساله ؟ شافو فبعضياتهم وصفاء شادة على فمها
صفاء : جري جري
الياس : اوييلي كيفاش نسيت غايكون عطاهليها
صفاء : جري دغيا نشوفو غي من بعيد ردة فعلها
الياس : صاف وقفي هنا تفو ديك العوج باقي كيبحلق فيها .
ف طابله يسرى وناصر والكارسون كيقدم الطلبات
ناصر : شكرا
يسرى : شكرا ..
الكرسون :هدي ليلك الاله
يسرى : شنو هادي
الكرسون : صيفتهاليك ديك السيد لي كان كالس هنا
يسرى : ( نضرات متسائلة ) الياس ؟؟ اشغيكون مكتوب فبها
صفاء : شووف هاهي غتفتحها
الياس : ششششت
ناصر : يسرى فتحي قراي و تفهمي
يسرى : اهاه ..واو هادا جوا باين فيه شي خاجه غرامية شوف القلوبا هه


ناصر : فتحي
يسرى : ( كاتقرا ومصدومة ) لاا ميمكنش
ناصر : شنو كاين
يسرى : هادا بغا يعبر لحبو لصفاء ولاكن الكرسون ملقاش صفاء حسابتو انا
ناصر : اوا شفتي شنو قتليك
صفاء : ( كضحك جاتها هستيريه ديال الضحك على التعبير دالياس الرمانسي ) هههههههه ايييه يا الياس فين كان مخبي هادشي
صفاء : الياس هادي مالها كضحك واش عجبها الحال يكما حتا هي كتبادلك نفس المشاعر
الياس : ششت والله ماعرفت تخبااي تخبااي
يسرى: ناري هادو فين مشااو
ناصر : غيكونو بغاو يهضرو على راحتهم
صفاء : والله مافهمت شي حاجه واش شتيها كي فرحات مكنتش كنتخيل ردة فعلها غاتكون هاكا ياكما كانت مخبعالك نفس المشاعر
الياس( فرحاان ) صفااء انا ممتيقيش واش بصح تكون كتبادلني نفس المشاعر ( غغغوت كاااانبغيييها بفرحتو ) كااانبغييييييك كااااانبغيييك
يسرى سمعات وكاطل من الشرجم هي وناصر وكاتشوفو كيقول كانبغيك وحداه صفاء كتنقز بالفرحه
يسرى : ناااري شوف شنو مخبعين عليا
ناصر : صاف ايسرى يمكن حشمو دابا ديري راسك معارفا والو وتصرفي عادي حتا يعاودلك انا ماشي شغلي ولاكن غي قلت رأيي
يسرى : اه عندك الحق زايدون ماتقولش هاكاك راحنا ولينا اصدقاء ولا لا مهم رجع رجع لطابله هاهوما جايين
رجعو لطابلة ورسمو تعابير البراءة على وجهم وبحالا ماعرفين والو
صفاء : حاهنا جينا الياس عيطلو صاحبو وتلهينا بالهدرة .
يسرى غير كاتشوف فيهم وفناصر وكضحك : لا خودو راحتكم .
الياس غي ساكت وحشمان
ناصر : احم احم مهم تعطلت غادي نمشي خليتلكم الراحه سي الياس لاله صفاء تشرفت بمعرفتكم مرة اخرى . يسرى شكرا على هاد الليله الجميلة مرة اخرى نعاودوها وغمز ليها ... ناصر كان شاب زويين و ملفت الانظار طويل و سموريتو فاتحه عينيه عسليين و شعرو قوي بني كان عندو فورمه مخدومه هادشي لي خلا صفاء تعجب بيه بسهولة وبقات مراقباه حتا خرج وهي ترجع بعينيها لالياس و يسرى .. هاد الثلاثة طاييحين فواحد سوء التفاهم كبييير
صفاء : يسرى مالك كتشوفي فيا هاكا اجي اممم فين هيا.. بغييت نقوول شفت الكارسون عطاك شي حاجه فين هيا !
يسرى بدات تشوف فيها هي و الياس و ضحك : ياك الياس ماشي حشوما عليك تخبع عليا هادشي
(( الياس حتا هو شاب طويل 34 فعمرو مرح و فكاهي فنفس الوقت خجول شعرو زعر وعينيه خوضر زينو كاوري ))
الياس : ا ان اناا دابا هو ( بدا كيتوتر و يتلعثم فالهضرة )
صفاء : لا ايسرى غير هو الياس ... اوا هضر الياس كمل
الياس : اشغنقول كنضن فاهمة كلشي ياك
يسرى : ههههه مالكوم سرطتو لسانكم ناري مكانش حسابتني الياس حشومي هاكا فينها داك بلا بلا ديالك ههه مهم انا نخليكم تعطلت خاصني نمشي نرتاح هاد النهار مكانش ساهل بسلامة
الياس ( حمد الله ملي تفك من داك الموقف لي حشمو بزاف ) اه ا يسرى صاف غير سيري غدا نتلاقاو بسلامه
يسرى حنات راسها ليهوم وقالت غي بلحس
يسرى : انا راه فهمت كولشي وخا متأخر وراني فرحانة بزاف .. ومشات خلات الياس حمر بحال ماطيشة و صفاء غير حالا فومها
صفاء : ناااري واش هادي يسرى منين جاتها هاد المحنة كامله كانت متوقعة تقلب علينا القهوة بلي فيها
الياس : هههه متصوريش فرحتي انا اسعد واحد فالدنيا .. يالاه نمشيو رجعي حتا نتي تأخر الوقت
يسرى دخلت كدوش و كتفكر موقفها مع رضا و بدات تفكر دكرايتها معاه و هبطو دموعها لاكن دغيا مسحاتهوم و لامت راسها ملي رجعت تفكر فيه
- اااوف لاش رجعتي لحياتي علاش مبغاتش صورتك تبعد من قدام عينيا اااوف ... معمري نرجع ليييك بدات تفكر نهار لي خطبها و نهار لي جات عينيه فعينيها و الفرحة لي حسات بيها نهار ركبو الخواتم و هي كتنشف شعرها و كتسترجع كاع دوك الدكريات لي دوزو و كتبتسم حتا تدكرات نهار بداو المشاكل
رضا : يسرى اش هاد السروال مزيير بزاف
يسرى : اووف ارضا بدينا عاوتاني ياك انا مكندخلكش فحوايجك يالاه راه تطلنا وزايدون شعري راه مغطي وتاحاجا معريانا
- كيفاش كلشي مغطي مستحيل نخرجك معاي هاككا كاملا مقزبا فين هيا روجولتي
- وااا رضا شحال كتزيد فيه
بدات يسرى تفكر كاع دوك النزاعات لي دازو على الملابس و على الماكلة وحتا قنوات التلفاز مكانو كيتفهمو فحتا حاجه و هي ترجع بداكرتها لنهار لي تفارقو بيه
رضااا انا عييييت تققهرت عييت بصبر حياتي كاملة و انا كنقرا و دابا نكلس فدار
- يسرى ديري عقلك واش خليتك مخصوصا من شي حاجا ؟؟ واش مكنقومش بواجب ديالي ؟؟ طلبتي شي حاجه و منفدتهاش انا ملول رافضلك الخدمة
- صاف انا ماقداش نصبر عاد. اسيدي طليقني و خليني نرتااح طلللقني
- يسرى شفتك فكل خصام بيناتنا تجبدلي الطلاق راه كنحشم غي من الحاجة منا والله حتاا نن
- اش غديير ؟؟ ااه اش غديير طللقني هي طلللقني
- صبري تسالا نتي طاااالق طااالق خرجي محياتي خدمي و لا مووتي متستاهليش حبي ليك و لا احترامي .. مووتي كااع راك مزال مكنعرفوش بعضياتنا مزيان .
بدات يسرى كتفكر و كتبكي خصوصا فاش مالقاتش دارليها شي حاجا قبيحة او قلل من احترامها مغير انو كان رافضلها الخدمه


يسرى بدات دابز مع دكرايتها باش تلقا شي حاجه خايبة و تكرهو و يمشي من داكرتها و لاكن لا ملقات والو و بدات تقول : كيفاش انا بديت نفكر هاكا علاش شحال هادي كنت كنقول غي كنكرهو .. علاش كنكرهو .. نكون زعما تهورت .. لا لا ايسرى فيقي هادا هو القرار الصحييح اااوف نوض نشرب كينه نعاس ونعس و الا راسي غينفجر .
نرجعو عند رضا .. رضا حتا هو راجل زوين بزاااف متوسط الطول بيض و حرفو كوحل عندو الليحيه كحلة خفيفة و شعر قوي منفوخ كحححل عينيه بحال مكحلين مقادين كوحل كيلبس زويين بحكم خدمتو لي خاصو يبان ديما انيق حساس بزاف و طبعو مغياار و قااسح و لاكن قلبو رهيييف ودغيا كيتأثر بمعنى اخر من اللداخل حنين و من بارا قاسح .. اما يسرى شافت غي الجانب القاسح و موصلاتش لدرجه تتعمقلو لداخل و تفهم انها خاصها فقط ديرلو الخاطر و السياسة غيعطيها عينيه لاكنها هي عنييييدة و عصبية و خا هاكداك حتا هي حنينة و مرحة
فهاد الوقيتة رضا كان فالجردة دواليديه كيشوف فنجوم وحتا هو سهاا بافكارو ف اللحضة لي تلاقا فيها يسرى و ديك الصدمه لترسمات على وجهها .. تخيلها بكل تفاصيلها بحال لا بغا يطيح فشباك جمالها مرة اخرى .. صوت .. سي رضا الحاج و الاله كيتسناوك فصالون باش تعشاو
- واخا انا جاي
مشا عند ماه و باه طبعهوم حنان بزاف و كيبغيو بعضياتهم عندهم ولد واحد لي هو رضا باه جدي بزاف و معقول و ماه حنينة وغي كاتبكي كيعاملو ولدهم كي الصحاب
- السلام وعليكم
- وعليكم السلام اولدي كلس ها ماك جايا كيداير مع الخدمه كلشي مزيان
- مزيان حمد الله
- ديك المشروع فين وصل
- غادي مزيان حمد غدا غادي نسافر ل افران نوقف بيدي على الخدمه
-اه مزيان هاكاك اوا الله يعاونك اولدي انا سيمانة جايه غنرجع لميركان على قبل العمارة لي كتصلح مسكين سي كريم واقف على كولشي بوحدو
- انشاءالله متعييش راسك الواليد راك مريض و سي كريم تاهو ردو البال لريوسكوم
فاطمه : ولدي لغزال نوض نتعشاو ها نعيمة جايبة العشا ززيد أ الحاج
كلسو يتعشاو بصمت شوية الحاج يقطع الصمت: رضا ولدي كنت كنهدر انا و ماك فواحد الموضوع و مكرهناش نشوفو رأيك و ناقشوه
فاطمه : الحااج خلي الولد ياكول بعدا
رضا : اشمن موضوع الواليد الله يسمعنا خير
فاطمه : هو اولدي انا وباك جبدنا بنت سي كريم سلات قرايتها و البارح تلاقيتها هي و ماماها فلاصال كبرااات اولدي ولات غزااله تبارك الله وزعمااا قلناا
الحاج : قلنا علاش متشوفهاش اولدي راها مناسبة ليك قارية و زوينة و مأدبة

شكرا ليك الزيونات على القصه روعه

العفو احبيبتي قريتها وبغيت نشااركها معكم

ويلي ظنيتها قصتك هههه حتى ساليت عاد قريت الردود

واااااعرة وااااعرة ههههههه